No mundo do fútbol, os xogadores adoitan converterse en heroes para os seus seguidores. Mais… foron algunha vez retratados como superheroes de banda deseñada? Usando IA xerativa impulsada polo software Midjourney, o proxecto de Instagram Rosal.ia elaborou unha serie de imaxes engaiolantes que representan os xogadores do Real Club Deportivo da Coruña caricaturizados como icónicos personaxes de literatura e cómic, xusto cando o equipo se prepara para xogar o playoff de ascenso á segunda división.

“Rosal.ia fusiona arte, cultura e a actualidade galega dun xeito único”, explican nun comunicado. Nesta ocasión, os xogadores do Dépor veñen de mutar noutras iconas de forza sobrenatural que van dende a Odisea, o cómic, ata a cultura pop, reflectindo non só as súas habilidades no terreo de xogo, senón tamén a súa influencia como personaxes públicos, así como a súa conexión coa afección.

Así, Lucas Pérez e Alberto Quiles aparecen nunha imaxe con máscaras de Batman e Robin, destacando a súa condición de mellor dúo goleador da categoría. Mario Soriano, fan do Joker, é retratado como o famoso vilán. O capitán Álex Bergantiños é debuxado como Superman, representando o seu retorno triunfal á propiedade. Ian Mackay, o mellor porteiro da categoría, é representado como a Pantera Rosa, un guiño ás súas salvacións e a súa característica vestimenta rosa. Ademais, o novo adestrador, Rubén de la Barrera, está debuxado como Ulises, liderando o barco branquiazul coa súa intelixencia táctica.

Este proxecto, centrado na creación de contidos singulares e na difusión da tecnoloxía, deu un paso para representar a actualidade galega e a súa cultura a través da lente da IA. “Rosal.ia achega unha perspectiva innovadora ao panorama dixital, buscando interactuar e reinterpretar a cultura e a actualidade galegas dun xeito divertido e accesible”, sinalan.