A Fundación Luis Seoane da Coruña acolle este venres 15 de setembro a festa de presentación da nova edición do Fanzine Fest, o festival de música electrónica de vangarda líder no noroeste e que será celebrada do 4 ao 9 de decembro de 2023.

Seguindo na liña de ofrecer un achegamento ao universo da música electrónica a través dunha unha visión heteroxénea e vangarda musical actual, no acto do día 15, que comezará ás 18.00 horas, os directores do festival, Pablo Cubeiro e Roi Grobas, darán a coñecer os detalles da programación da novena edición do Fanzine Fest. Ao remate da súa intervención comezará unha festa que se prolongará ata a 01:00 horas e que contará cun cabeza de cartel de excepción: o alemán Anthony Rother.
Con el, o mexicano Alejandro Franco e os galegos Elektrogencia, R0b0t City e Roi completarán o cartel dunha sesión que celebrará o anuncio do Fanzine Fest 2023 como se merece: bailar.

O festival naceu en 2015 da man de Fanzine Project -promotor, selo discográfico e escola- para promover a accesibilidade, o coñecemento e a expansión da música electrónica na Coruña.